Logic RACE

Logic RACE - తెలుగు జాతి. మీరు తెలుగు వారా? జాయిన్ అయ్యి, చట్ట విరుద్దం కాని ఏ విషయమైనా స్వేచ్చగా పోస్టు చేయండి.

Logic RACE is Telugu people from Andhra Pradesh, Telangana, India and worldwide.

Join the RACE Log in
loading...

ఇంగ్లిషు పంతుళ్ల సుఖాలూ క‌ష్టాలూ

Sridhar Bollepalli

సోష‌ల్ స్ట‌డీస్ లో "సిపాయిల తిరుగుబాటు" అనే పాఠం బాగా చ‌దివాం. ఎందుకు జ‌రిగింది, ఎవ‌రెవ‌రు నాయ‌క‌త్వం వ‌హించారు, ఫ‌లితాలేంటీ అనేది మ‌న‌కి క్షుణ్నంగా అర్థ‌మైపోయింది. ఆ త‌ర్వాత పాఠం "మొద‌టి ప్ర‌పంచ‌యుద్ధం" అనుకోండీ. మ‌ళ్లీ ఆ పాఠాన్ని ఆసాంతం కొత్త‌గా బుర్ర‌లోకెక్కించుకోవాల్సిందే. ముందు చ‌దివిన పాఠం తాలూకూ జ్ఞానం వ‌ల్ల రెండో పాఠం నేర్చుకోవ‌డం సుల‌భ‌త‌రం కాదు. ఇది సోష‌ల్ స్ట‌డీస్ తో వున్న యిబ్బంది.

ఇంగ్లిష్ అలాక్కాదు. మొద‌టిపాఠం మ‌న‌కి సూప‌ర్‌గా అర్థం అయిపోతే రెండో పాఠంలో కొత్త‌గా తెలుసుకోవాల్సింది ఏమీ వుండ‌దు. ఎందుకంటే, మొద‌టి లెసన్ లోనే వంద‌లాది ఆర్టికిల్సూ, ప్రిపొజిష‌న్సూ, టెన్సులూ, క‌న్‌జంక్ష‌న్లూ... యివ‌న్నీ వ‌చ్చేస్తాయి. వాటిలో ఏవి ఎందుకు ఎక్క‌డెక్క‌డ ఎలా వ‌చ్చాయో తెలిసిపోతే.. అవే రూల్సు రెండు, మూడు, ...ప‌దో పాఠంలో కూడా ఉప‌యోగ‌ప‌డ‌తాయి. ఇది ఇంగ్లిషుతో వున్న సుఖం. కానీ, ఆ వొక్క పాఠం పూర్తిగా అర్థం కావ‌డం అన్న‌ది ఏనాటికీ జ‌ర‌గ‌దు. ఎందుకంటే.. ఒక్కొక్క వాక్యంలో తెలుసుకోవాల్సిన విష‌యాలు ఒక ప‌ది వుంటాయి. ఉదాహ‌ర‌ణ‌కి ప‌దోత‌ర‌గ‌తి ఇంగ్లిష్ టెక్స్ట్ బుక్ ఫ‌స్ట్ లెసన్‌లో వున్న ఈ వాక్యం చూడండి.

His parents decided not to send him to a special school - a decision he said was very hard for him, but which may have been the best decision they could have made for him.

ఈ వాక్యానికి తెలుగు అర్థం ఏంటో చెప్పేసి దులిపేసుకుందాం అనుకుంటే చిక్కే లేదు. కానీ, అందులో వున్న సూత్రాల‌న్నీ పిల్ల‌ల‌కి అర్థం కావాలి. అలా అయ్యాకే త‌ర్వాత వాక్యానికి పోదాం అనుకుంటే.. ఆ వొక్క పాఠం అవ‌డానికే రెండు మూడు నెల‌లు ప‌డుతుంది. అంద‌రు పిల్ల‌ల‌కీ అర్థం కావ‌డానికి కాదు.. క్లాసులో వుండే 20% తెలివైన పిల్ల‌ల సంగ‌తే నేను మాట్లాడేది. సిల‌బ‌స్ పూర్తి చేయాల‌న్న ఆరాటంతో ప‌రిగెత్త‌కుండా.. మొద‌టి లెస‌నే నాలుగైదు సార్లు చెప్ప‌డం వ‌ల్ల యింకా ఎక్కువ వుప‌యోగం వుంటుంద‌ని నా వ్య‌క్తిగ‌త అభిప్రాయం. అస‌లు ఇంగ్లిష్ టెక్స్ట్ బుక్స్ లో అన్నేసి క‌ష్టమైన లెసన్స్ వుండ‌డం ప‌ట్ల కూడా నాకు చాలా వ్య‌తిరేక‌తం వుంది. నా యిష్టాయిష్టాలూ జ‌డ్జిమెంట్లు కాసేపు ప‌క్క‌న పెడితే.. ఈ ముచ్చ‌టి వ‌ల్ల మీ పిల్ల‌ల‌కి ఏదైనా వుప‌యోగం వుంటుందేమో అని చెపుతున్నాను.

మా అబ్బాయి ఇంజినీరింగ్ ఫైన‌లియ‌ర్ చ‌దూతున్నాడు. వాడి ఫ్రెండ్సు చాలామంది ప‌రిచ‌య‌మే నాకు. అండ్‌, మా చుట్టాలు స్నేహితుల పిల్ల‌ల్ని కూడా చాలామందిని చూస్తంటాను క‌దా..! కోర్ స‌బ్జెక్టుల‌న్నీ చింపి ప‌క్క‌న ప‌డేసేవాళ్లు కూడా ఇంగ్లిష్ అనేస‌రికి భ‌య‌ప‌డుతుంటారు. ఉద్యోగాల కోసం రాసే ప‌రీక్ష‌ల్లో మొద‌టిరౌండు ఎప్పుడూ ఇంగ్లిష్‌, రీజ‌నింగే. చివ‌ర్లో జ‌రిగే యింట‌ర్వ్యూలో కూడా అభ్య‌ర్థికి ఎంత యింగ్లిష్ వ‌చ్చూ అనేది చాలా యింపాక్ట్ చూపెడుతుంది. మ‌రీ పెద్ద పెద్ద స్కూళ్ల‌లో చ‌దివేవాళ్లూ, సూప‌ర్ మెరిట్ పిల్ల‌లూ, యింట్లో యింగ్లిష్ మాట్లాడుకునేంత హైఫై ఫ్యామిలీసూ .. వీళ్ల‌ని వ‌దిలేస్తే మిగ‌తావాళ్లంద‌రికీ యిదొక పెద్ద గండం.

నేను బ‌జారుకెళ్లి కూర‌గాయ‌లు తెస్తాను అన‌డానికి I market go vegetables bring అని రాసేవాళ్లు చాలామంది వుంటారు. (నేను మాట్లాడుతున్న‌ది ప‌రీక్ష‌ల్లో సొంతంగా వాక్యాలు రాయాల్సి వ‌చ్చిన‌ప్పుడు పిల్ల‌లు ఏం చేస్తారూ అనేది). అది కూడా ఆయా ప‌దాల‌కి వాళ్ల‌కి స్పెల్లింగ్ రాయ‌డం క‌రెక్టుగా వ‌చ్చు అనుకుంటే. లేక‌పోతే సింధూ నాగ‌రిక‌త ప్ర‌జ‌ల చిత్ర‌లిపిని డీకోడ్ చేయ‌డానికి పోడ‌మే సుఖం పేణానికి అనిపించి తీరుతుంది.

ఇంగ్లిష్ స‌బ్జెక్ట్ టీచ్ చేయ‌డం చాలా క‌ష్ట‌మ‌బ్బా..! ఒక్కో పాఠం పూర్త‌య్యేస‌రికి త‌ల‌ప్రాణం తోక‌లోకొస్త‌ది. ఇంగ్లిష్ టీచ్ చేయ‌డం చాలా తేలిక‌బ్బా..! రెండు మూడు పాఠాలు పిల్ల‌ల‌కి బాగా అర్థ‌మైతే ఆ త‌ర్వాత మ‌నం పెద్ద‌గా సుడిబ‌డ్డానికి ఏమీ వుండ‌దు.

Discussion (0)